احترف تركيب الكانيولا بالصور

الاوراق المطلوبه للحصول على شقه فى مبادرة التمويل العقاري من بنك qnp 

1- بتروح البنك تقدم الورق الخاص بك و بالشقة ( أنا قدمت ورقى و ورق الشقة فى بنك QNB ) :

*** كل الورق اللي اطلب منى خلال الدراسات و قدمته ( كانت الوظيفة فيه أعمال حرة ) : 

وصل مرافق حديث

 بطاقة رقم قومي سارية

 شهادة دخل من محاسب قانوني بصافي الدخل الشهري

 شهادة مزاولة المهنة الخاص بالمحاسب و كارنيه النقابة و شهادة تسجيله فى جدول المحاسبين و المراجعين

 شهادة أنك شغال فى الوظيفة دى لمدة أكتر من سنة

 شهادة بموقفك الضريبي و التأميني من محاسب قانوني ( و يفضل يكون الورق كله من نفس المحاسب القانوني عشان بيروحوا يستعلموا عنك عند المحاسب القانوني فى مرحلة التقييمات فى الآخر ف يفضل يكون كل الورق من نفس المحاسب عشان الوقت مايطولش ، و اللى عملت الورق عنده الأستاذ محمد جابر و رقمه 01099791794 و هو محترف و بيساعد جدا و مكانه فى مدينة العاشر من رمضان )

 شهادة خبرة من الأماكن اللى اشتغلت فيها قبل كده

 و برنت تأمينات لو كان متأمن عليك قبل كده

 ورق خاص بضامن من الدرجة الاولى ليك

 كشف حساب بنكي ليك آخر 6 شهور

____________________________

*** الورق اللى قدمته للشقة ( كانت شقة أهالي مش تبع الأحياء أو مباني الدولة ) :

 صورة بطاقة البائع

 عنوان الوحدة بالتفصيل

 أرقام تليفون للبائع ( الرئيسي و رقم احتياطي )

 مساحة الشقة

 صورة من قرار التخصيص

 صورة من ترخيص البناء

 صورة من عقد بيع الشقة و التوكيلات الخاصة بها

 محضر استلام قطعة الأرض

____________________________

2- بعد ما روحت البنك وقدمت الورق، مضيت هناك على ورق خاص بطلب تمويل الشقة بمبادرة ال 3%

3- بعد ما بتقدم ورقك و الطلب بتاعك ، البنك بيتواصل معاك لو فى أى ورق ناقص او أي حاجة مش واضحة عشان يكمل الملف الخاص بيك خلال أسبوع

4- بعد كده البنك بيبدأ يدرس فى حالتك من نواحي كتير ( مالية و وظيفية و تأمينية و .. إلخ )

( و دى أطول فترة بتمر عليك خلال الدراسات لأنها بتاخد وقت طويل فى الدراسة تقريبا شهر و نص أو شهرين عشان بتمر بمراحل كتير دراسة ائتمانية و مالية و دراسة مخاطر ، و فى حالتى اخدت طويل – 4 شهور - لأن الشخص المسئول عن ملفي كان بيرفع داتا غلط و كنت لازم كل شوية اروح البنك اقف فوق دماغه عشان يصلح الأمور و أنا قاعد معاه و أوقات كنت بدخل لمدير الفرع عشان يحل لى المشكلة ، ف نصيحة خليك زنان و تابع الموضوع أول ب أول عشان لو مسألتش محدش هيهتم بالحالة بتاعتك )

5- بعد الدراسات ما بتخلص و إن شاء الله يوافقوا عليك بيبدأ المقيم ينزلك ( أول ما المقيم ينزل تعرف أن الحمد لله فاضل تقريبا اسبوع أو اسبوعين و تستلم شقتك )

6- فى مقيم بينزلك محل سكنك و يستعلم عنك ، و فى مقيم بيروح للمحاسب القانوني يسأل عليك ( عشان كده يفضل يكون محاسب واحد بس اللى يعملك كل ورقك )

7- بعد كده بيرفعوا الداتا الخاصة بيك على السيستم و حد بيتصل بيك يراجعها معاك

8- بعد أسبوع تقريبا بينزل مقيم للشقة ، بيتصل بيك و بيتأكد من بيانات الشقة و بعدها ينزل

9- المقيم بيرفع تقريره فى نفس اليوم أو اليوم اللى بعده على طول ، و حاول برده تتابع الموضوع اول ب اول مع البنك و تعرف اتقيمت بكام ضروري

10- بعد كده العقود و التوكيلات بتجهز ليك أنت و البائع و بتتبعت لك عشان تطبعها و تروح تعمل توكيل للبنك

11- التوكيل بيكون فى أي شهر عقاري مش شرط اللى انت تابع له ، و كذلك البائع برده بيعمل توكيل للبنك

12- بعد ما بتعملوا التوكيلات ، بتروحوا البنك من بدرى الساعة 8 و نص عشان اليوم ده بيكون طويل ( ممكن يطول لحد 4 او اكتر عشان البائع يستلم الشيك ) ، أنت بتمضي على ورق كتير و شيكات و 4 نسخ من العقود أنت و المالك و بعدها البنك بيرفع الإمضاءات بتاعتكم على السيستم و بعد كده بيصرف للبائع الشيك ب 85% من قيمة الشقة اللى المقيم قدرها بيها ، يعنى لو أنت هتشتري الشقة ب مليون و المقيم قال أنها تسوى 900 بس ف البنك هيدي لك 85% من ال 900 و انت اللى هتكمل الباقي كاش ، بس المقيم فى الغالب بيقيم الشقة بنفس سعرها أو أقل حاجة بسيطة أو على حاجة بسيطة

13- نصيحة حاول تطلب أنك تشوف العقود قبل ما تروح البنك عشان عشان لو فى أى بنود عايز تضيفها فى العقد أو أي حاجة حابب تستفسر عنها

14- المفروض أنك بتسلم البائع المقدم ال 15% بأى طريقة ترضيكم أنتوا الاتنين سواء تحويل بنكي أو كاش بس أهم حاجة تاخد ورقة من البائع أنه استلم المقدم ( فى حالتي عملت للبائع تحويل بنكي و احنا فى البنك و اتكتب فى الورق السبب مقدم شقة المبادرة )

15- و فى مبلغ إداري بتدفعه للبنك عبارة عن 1% من قيمة التمويل ، يعنى لو هتاخد من البنك 600 ألف ف أنت هتدفع 6000 جنيه رسوم إدارية و ممكن تطلب أنها تضاف علي التمويل

16- بعد ما الورق بيترفع و الشيك بيتصرف للبائع بيكون كده تم بحمد لله

____________________________

 شوية نصايح للحصول علي شقه فى مبادرةالتمويل العقاري :

حاجة مهمة جدًا إنك تكون متفق مع البائع علشان مسيبكش في نص الطريق وتضطر تدور على شقة تاني

سواء بعقد وعد بالبيع لمدة معينة عند محامي أو بأي اتفاق بينك وبينه

ضروري تقرأ الاشتراطات الخاصة بالشقق عشان تبقى عارف تدور على شقة بمواصفات ايه بالظبط ، المواصفات مش صعبة إطلاقاً بس مهم تعرفها

البنك بيطلب حاجات كتير ، فاللي يطلبه البنك منك هاته ومتيسأش البنك بيكون عاوز يضمن إنك تقدر تسدد بس ، انت بالنسبة له مستثمر أصلاً.

مع كل خطوة افضل تتابع مع البنك كتير جدًا وتتصل بالخط الساخن وتطلب حد من إدارة التمويل العقاري يكلمك ويبلغك بالتطورات لو الموظف اللي بتابع معاه مش بيبلغك

نصيحة أخوية ضروري تكون صبور و تطول بالك و ماتيأسش أبدا و تكون مليان ثقة فى ربنا و ادعى أن لو ليك خير فيها ربنا يكتبها لك ، الشقة جات بعد 5 شهور خلالها كان فى احباطات و يأس شوية بس ربنا كبير و رحيم الحمد لله

و أخيرا ربنا يوفق الجميع